Elfen bwysig gyntaf yr adolygiad oedd ymgymryd ag adolygiad ar unwaith o ran cynllunio gwastraff peryglus mewn ymgynghoriad â’r Grwpiau Gwastraff Rhanbarthol eraill, er mwyn paratoi a chyhoeddi’r meini prawf neu bolisïau lleoli fel atodiad i’r Cynllun Gwastraff Rhanbarthol a fydd yn arwain cynigion y dyfodol ynglyn â chyfleusterau trin a gwaredu gwastraff peryglus.

Bu’r Adroddiad ar Wastraff Peryglus (Medi 2005), yn destun ymgynghoriad â’r cyhoedd a buddiolwyr allweddol ac fe’i cadarnhawyd gan y Fforwm Aelodau Rhanbarthol ddydd Gwener 9 Medi. Cyn cyhoeddi’r Adroddiad yn ffurfiol a’i gyflwyno i Lywodraeth Cynulliad Cymru, mae’n rhaid i bob un o’r awdurdodau cyfansoddol yn Ne-orllewin Cymru ei gadarnhau. Mae’r broses hon eisoes wedi cychwyn.

Mae’r Adroddiad yn mynd i’r afael ag anghenion pedwar grwp o bobl:

• Y Comisiwn Ewropeaidd – o ran cyflawni rhwymedigaeth y DU dan y Gyfarwyddeb Fframwaith Gwastraff a’r Gyfarwyddeb Gwastraff Peryglus i sicrhau bod rhwydwaith digonol ac integredig o gyfleusterau gwastraff drwy sefydlu meini prawf lleoli ar gyfer cyfleusterau rheoli gwastraff;
• Datblygwyr o’r diwydiant rheoli gwastraff – o ran darparu arweiniad clir ar bolisïau a gweithdrefnau’r system ar gyfer sicrhau caniatâd cynllunio;
• Aelodau a Swyddogion Awdurdodau Lleol – o ran darparu asesiad cywir a chlir o’r materion cynllunio sy’n ymwneud ag amrywiaeth eang o gyfleusterau sy’n gallu trin deunyddiau a ddiffinnir fel gwastraff peryglus; a’r
• Gymuned Leol– o ran darparu mesur o hyder ynglyn â sut a ble bydd gwastraff peryglus yn cael ei drin.

Mae’r Adroddiad yn y lle cyntaf yn trafod y cyd-destun ehangach drwy adolygu’r newidiadau deddfwriaethol a gafwyd yn ddiweddar a chyflwyno a dadansoddi’r data cyfredol ar lefelau a chyfleusterau gwastraff peryglus. Yna mae’r Adroddiad yn mynd i’r afael ag anghenion y pedwar grwp a nodwyd drwy:

• ymchwilio i’r ystyriaethau cynllunio defnydd tir ar gyfer ystod o gyfleusterau sy’n gallu trin deunyddiau a ddiffinnir fel gwastraff peryglus;
• ymchwilio i reolyddion presennol y system cynllunio defnydd tir a’r goblygiadau; a thrwy
• drafod pob math o gyfleuster gwastraff peryglus yn ei dro, unrhyw newid o ran amgylchiadau er cyhoeddi’r CGRh a nodi’r meini prawf lleoli priodol ar gyfer pob un o’r mathau o gyfleusterau.

Mae’r rhan olaf o’r Adroddiad yn nodi’r meini prawf lleoli sy’n gyffredin i bob math o gyfleuster gwastraff.

Os hoffech lawrlwytho’r ffeil ganlynol, bydd angen Acrobat Reader fersiwn 6.0. Cliciwch ar ddelwedd Acrobat Reader i lawrlwytho am ddim.

Adroddiad ar Wastraff Peryglus (Medi 2005) (Yn Saesneg) (pdf)

BACK